У «Белтэхаглядзе» расказалі пра праблему, з якой сутыкаюцца некаторыя кіроўцы. Яна звязаная з новаўвядзеннем па тэхаглядзе, якое ўкаранілі ў лістападзе мінулага года.
Каротка пра тое, пра якое змяненне гаворка
У лістападзе 2024 года стала вядома, што з’явіліся новыя анлайн-паслугі што да транспарту. Так, некаторыя фізічныя і юрыдычныя асобы могуць у анлайн-рэжыме атрымаць адзнаку пра пройдзены тэхагляд. Гэтым новаўвядзеннем могуць скарыстацца ўладальнікі транспарту, выпушчанага менш за два гады таму. Такім аўтамабілістам не трэба праходзіць тэхагляд, дастаткова толькі паставіць дазвол на допуск транспартнага сродку да ўдзелу ў дарожным руху.
Якая цяпер узнікла праблема
У «Белтэхаглядзе» паведамілі, што некаторыя кіроўцы, якія скарысталіся магчымасцю анлайн атрымаць адзнаку пра пройдзены тэхагляд, сутыкаюцца са складанасцю. «Спецыялісты банкаў (крэдытных арганізацый) не маюць магчымасці пераканацца ў наяўнасці выдадзенага дазволу ў электронным выглядзе, атрыманага ўласнікам транспартнага сродку праз адзіны партал электронных паслуг „Е-Паслуга“, — адзначаюць у арганізацыі. — З прычыны чаго ўласнікі транспартных сродкаў вымушаныя звяртацца ў „Белтэхагляд“ па атрыманне пацверджання наяўнасці выдадзенага дазволу ў электронным выглядзе, што стварае нязручнасці для аўтаўладальнікаў».
У «Белтэхаглядзе» ўдакладняюць, што гаворка пра той транспарт, які ўзялі ў крэдыт ці лізінг.
«Для ўрэгулявання сітуацыі „Белтэхагляд“ скіраваў ліст на адрас Нацыянальнага банка з прапановай інтэграцыі банкаўскіх інфармацыйных сістэм з адзіным парталам электронных паслуг „Е-Паслуга“ з мэтай атрымання актуальных звестак пра выдадзеныя дазволы на допуск транспартнага сродку да ўдзелу ў дарожным руху падчас прыняцця транспартных сродкаў у заклад», — паведамілі ў арганізацыі.
Чытайце таксама
