Аляксей Аўсюкевіч памёр ва ўзросце 41 года. Ён быў рабочым — на «Цеплавых сетках», якія належаць «Гроднаэнерга», і на іншых прадпрыемствах у Гродне, піша «Наша Ніва».
Паводле інфармацыі праекта Digital Intelligence Team, Аўсюкевіч быў у базе «Беспарадкі». У міліцэйскі спіс экстрэмістаў яго ўключылі 28 кастрычніка 2022 года. Звычайна гэта адбываецца адразу, калі крымінальны прысуд уступае ў сілу.
Аляксей Аўсюкевіч быў асуджаны Ленінскім раённым судом Гродна па артыкуле 369 Крымінальнага кодэкса — «Абраза Лукашэнкі». У чым заключалася абраза, незразумела. Гродзенец атрымаў «хатнюю хімію».
Аўсюкевіч памёр 11 кастрычніка 2024 года. Невядома, знаходзіўся ён яшчэ на «хіміі» ці на той момант яна ўжо скончылася.
Пазначаная прычына смерці — R99, «іншыя неўдакладненыя прычыны смерці». Гэта значыць, што доктар адразу не ведаў, чаму памёр чалавек, ці падазраваў крымінальную прычыну смерці. Напрыклад, такі ж код у базах стаіць у звестках пра смерць міністра замежных справаў Уладзіміра Макея і палітвязня Вітольда Ашурка.
Змесціва сацсетак гарадзенца паказвае, што ў непрыманні асобы Аляксандра Лукашэнкі супалі прадстаўнікі самых розных груп грамадства, адзначае «Наша Ніва». Той кантэнт, які Аўсюкевіч лічыў класным і рэпосціў на сваю старонку, — цытаты расійскага палітыка Уладзіміра Жырыноўскага, кампліменты Сталіну і розныя Z-легенды. Разам з тым Аляксей фатаграфаваўся з помнікам Льву Сапегу і дошкай памяці Міхала Казіміра Агінскага.
Чытайце таксама
