КДБ выставіў абвінавачанне 30 фігурантам крымінальнай справы пра падрыў расійскага разведвальнага самалёта А-50 на вайсковым аэрадроме ў Мачулішчах. Пра гэта паведамілі ў эфіры тэлеканала АНТ.
Затрыманым інкрымінуецца частка 3 артыкула 289 КК (Акт тэрарызму, учынены арганізаванай групай).
Раней у Беларусі ўнеслі спецыяльныя папраўкі ў крымінальнае заканадаўства. Цяпер найвышэйшая мера пакарання можа пагражаць не толькі за акт тэрарызму, але нават за замах на здзяйсненне акту тэрарызму або падрыхтоўку да яго.
Адзначым, што ў адпаведнасці з КК Беларусі смяротнае пакаранне не можа быць прызначанае жанчынам, а таксама мужчынам, якія дасягнулі да дня вынясення прысуду 65 гадоў, і асобам, якія ўчынілі злачынствы ва ўзросце да васямнаццаці гадоў.
Нагадаем, раніцай 26 лютага ў ваколіцах вайсковага аэрадрома ў Мачулішчах чулі два выбухі. У BYPOL паведамілі, што былі пашкоджаныя расійскі вайскова-транспартны самалёт і снегаўборачная тэхніка.
